काठमाडौं - शनिबार दिनभर बन्द रहेको लामोसाँघु-जिरी सडकखण्ड खुलेको छ । दुर्घटनामा मृत्यु भएकाका परिवार र ट्रक कन्टेनरबीच सहमति भएपछि बाटो खुलेको हो ।
ट्रक कन्टेनरको तर्फबाट मृतकको परिवारलाई १० लाख ५० हजार क्षतिपूर्ति दिने, क्रिया खर्चका लागि ५० हजार दिने र २२० पल्सरको क्षतिपूर्ति दिने सहमति भएको छ ।
यसैगरी दुर्घटनामा मृत्यु भएका मृतक दावा छिरिङ तामाङको परिवारलाई लिसंखुपाखर गाउँपालिकाले १ लाख आर्थिक सहयोग गर्ने भएको छ । गाउँपालिका अध्यक्ष राजु लामाले तामाङका २ जना छोरा र छोरीलाई कक्षा १२ सम्म निःशुल्क अध्ययनको जिम्मा गाउँपालिकाले लिने जानकारी दिए ।
शुक्रबार दोलखाबाट काठमाडौं जाँदै गरेको मालबाहक ट्र्कले विपरीत दिशाबाट आउँदै गरेको मोटरसाइकललाई लामोसाँघु-जिरी सडक खण्डको ८ किलो नजिक ठक्कर दिँदा डाँडापाखरका तामाङको जलेर मृत्यु भएको थियो ।
मधेश प्रदेश ०३-००२ ख ०५३४ नम्बरको ट्रकले बागमती प्रदेश ०२-०३३ प ७३०६ नम्बरको मोटरसाइकललाई ठक्कर दिएपछि मोटरसाइकलमा आगलागी भएको थियो । शनिबार सहमति नहुञ्जेल बलेफि गाउँपालिकाको खाडिचौर र ८ किलोमा मृतकका आफन्तले सडकमै शव राखेर प्रदर्शन गरेका थिए ।
-1736338790.png)
