काठमाडौं - कोशी प्रदेश सरकारले आगामी २०८२ वैशाख १८ र १९ गते लगानी सम्मेलन गर्ने निर्णय गरेको छ । 

बिहीबार विराटनगर स्थित मुख्यमन्त्री तथा मन्त्रिपरिषद् कार्यालयमा बसेको मन्त्रिपरिषद् बैठकले यही माघ ११ देखि १३ गते सम्म आयोजना गर्ने भनिएको लगानी सम्मेलन सारेर वैशाख १८ र १९ गते निर्णय गरेको कोशी प्रदेश सरकारका प्रवक्ता एवम् आन्तरिक मामिला तथा कानुन मन्त्री रेवतीरमण भण्डारीले जानकारी दिए । 

परियोजनाहरुको शोकेसिङ, कानुन संशोधन र खरिद प्रक्रिया लगायतका कार्य गर्न समय अभाव भएकोले लगानी सम्मेलन सारिएको उनले बताए । 

कोशी प्रदेश सरकारले करिब १ खर्बको लगानी भित्र्याउने गरी लगानी सम्मेलन आयोजना गर्न लागेको हो । लगानी सम्मेलनका लागि ३७ वटा परियोजनाहरूलाई शोकेसमा राखिएको छ । यसका लागि विभिन्न समिति र सचिवालय समेत गठन भइसकेको छ ।