काठमाडौं - नेपाली काँग्रेसका नेता तथा प्रचार विभाग प्रमुख मीन विश्वकर्माले अब पार्टी बुढाहरूबाट चल्दैन, पुस्तान्तरण हुनुपर्छ भन्ने गलत भाष्य निर्माण भएको बताएका छन् ।
मंगलबार पार्टी कार्यालय सानेपामा आयोजित ‘राष्ट्र निर्माणमा युवाको योगदान,तथ्यमा आधारित प्रचार अभियान’ कार्यक्रममा बोल्दै उनले भर्खर बनाएका पार्टी चाहिँ जति वर्षकाले बनाए पनि स्वतः युवाको पार्टी हुने अनि पुराना पार्टी जसले पटक–पटक क्रान्ति, संघर्ष र आन्दोलन गरेर नागरिकहरूलाई स्वतन्त्र गर्नासाथै समृद्ध बनाउने प्रतिस्पर्धामा छन् ,त्यो चाहिँ स्वतः बुढाको पार्टी हुन्छ ?भन्दै प्रश्न गरे ।
उनले भने,‘भर्खर बनाएका पार्टी चाहिँ जति वर्षकाले बनाए पनि स्वतः युवाको पार्टी हुने र पुराना पार्टी जसले पटक–पटक क्रान्ति, संघर्ष र आन्दोलन गरेर आज नागरिकहरूलाई स्वतन्त्र गर्नका साथै समृद्ध बनाउने प्रतिस्पर्धामा छौँ । तर यो स्वतः बुढाको पार्टी हो भन्ने बजारमा भाष्य छ । जनमानसमा पार्टी बुढाहरूबाट चल्दैन, पुस्तान्तरण हुनुपर्छ भनेर सजिलै भनिदिनुहुन्छ । गरेको चाहिँ नदेख्ने र गर्छु भन्नेलाई चाहिँ दिनुपर्छ भनेर हावामा विश्वास गर्ने ? यो भाष्य बजारमा देखिएको छ । देशव्यापी रूपमा यो भाष्यलाई चिर्नको लागि खण्डन गर्ने गरी एउटा सन्देश चाहिँ लानुपर्छ भनेर एउटा नारा तयार गर्यौं ।’
त्यस्तै उनले आफू कुन पार्टीमा छु भन्ने पनि ख्याल नगरी काँग्रेसका नेताहरूले सामाजिक सञ्जालमा आएका कुराहरूको लहलहैमा लागेर धारणा राख्ने गरेको टिप्पणी गरे ।
२०–२२ वर्षको केटाकेटीले बनाएको पार्टी काँग्रेस भएको भन्दै वर्तमान अवस्थामा पनि पार्टीमा युवा पनि रहेको उनको भनाइ छ ।
