काठमाडौं - शुक्रबारबाट प्रदर्शनमा आएको नेपाली एक्सन फिल्म ‘पिताम्बर’ले हलहरूमा राम्रो शो पाइरहेको छ ।
आइतबार काठमाडौंमा आयोजना गरिएको प्रेस शोपछि सञ्चारकर्मीहरूसँगको कुराकानीमा निर्देशक कृषा चौलागाईँले नयाँ वर्ष २०८२ को छेको पारेर प्रदर्शनमा आएको फिल्म ‘पिताम्बर’ ले दर्शकबाट सकरात्मक प्रतिक्रिया पाइरहेको जानकारी दिइन् ।
उनले शुक्रबारदेखि नै धेरै सन्देशरु आइरहेको, हल भिजिटमा जाँदा उत्तिकै माया पाइराखेको कारण सुटिङको दौडानमा परेका अप्ठ्याराहरु नै भूलेको बताइन् ।
उनले भनिन्,‘सिनेमाले राम्रो प्रतिक्रिया पाउँछ । दर्शकले माया गर्नुहुन्छ भनेर विश्वास थियो, त्यही भइरहेको छ । धेरै तनाव पनि लिएको छैन । शुक्रबारदेखि नै सकारात्मक सन्देशहरू पाइरहेका छौं । हल भिजिटमा जाँदा उत्तिकै माया पाइराखेको छौं । जसले गर्दा सुटिङको दौडानमा परेको कठिनाइहरू बिर्सेको छु ।’
त्यस्तै नायक प्रदीप खड्काले आफ्नो फिल्म करियरकै सबैभन्दा राम्रो फिल्म ‘पिताम्बर’ भन्ने दर्शकहरुको प्रतिक्रिया आइरहेको सुनाए । उनले भने,‘फिल्मले धेरैलाई तान्छ । मेरो ११ वर्षको करियरमा सबैभन्दा राम्रो फिल्म बनेको रहेछ भनेर प्रतिक्रिया दिनुभएको छ ।’
त्यस्तै अभिनेत्री दिव्या रायमाझीले आफू कहिल्यै पनि एक्सन फिल्म हेर्न मन नपराउने भनेपनि पिताम्बर हेरेर आफू फ्यान भएको बताइन् ।
उनले भनिन्,‘म कहिल्यै पनि एक्सन मूमी नहेर्ने मान्छे हुँ । तर पिताम्बरको फ्यान हुन पुगें । प्रदीप खड्काजीले पहिले यस्तो एकसन मूभी गर्नुभएको थिएन । धेरै राम्रो चलचित्र बनेको छ ।’
