रामेछाप - तीन लालको जिल्ला रामेछापमा आजबाट तीनदिनसम्म कम्युनिष्ट नेताहरूको जमघट हुँदै छ ।
नेपाली साहित्यका प्रथम सहिद सुब्बा कृष्णलाल, प्रजातान्त्रिक आन्दोलनका सहिद गङ्गालाल र नेपाल कम्युनिष्ट पार्टीका संस्थापक पुष्पलालको जन्मथलो रामेछापमा सुब्बा कृष्णलालको बलिदान शताब्दी र पुष्पलालको जन्म शताब्दी मनाउन नेताहरू रामेछापमा भेला हुन लागेका हुन् ।
सो अवसरमा कृष्णलाल बलिदान शताब्दी, पुष्पलाल जन्म शताब्दी मूल समारोह समितिले रामेछापमा तीन दिने कार्यक्रम आयोजना गर्दै छ । समितिका संयोजक अशोक सुवेदीका अनुसार आज काठमाडौंबाट आउने नेताहरूलाई कृष्णलालको जन्मथलो कठजोर लगिने छ । त्यस्तै आजै नेताहरू गङ्गालाल र पुष्पलालको जन्मथलो रामेछापको भँगेरी पुग्ने छन् ।
आइतबार मन्थलीमा नेपाली साहित्य र राजनीतिमा कृष्णलाल, गङ्गालाल र पुष्पलालको योगदानका विषयमा अन्तरक्रिया आयोजना गरिने छ । सोमबार साहित्यिक कार्यक्रम आयोजना हुने मन्थलीमा आयोजित पत्रकार सम्मेलनमा सुवेदीले जानकारी दिए ।
कार्यक्रममा पुराना कम्युनिष्ट नेता मोहनचन्द्र अधिकारीका साथै एमाले उपाध्यक्ष युवराज ज्ञवाली, नेकपा माओवादी केन्द्रका उपमहासचिव लीलामणि पोख्रेल, नेकपा मालेका महासचिव सिपी मैनाली, एकीकृत समाजवादी नेत्री रामकुमारी झाँक्री, परराष्ट्रविद् हिरण्यलाल श्रेष्ठ, कम्युनिष्ट नेता ईश्वरी दाहाल (असारे काका), एमाले नेत्री शान्ता मानवी, समाजवादी कम्युनिस्ट पार्टी नेपालका महासचिव पूर्णबहादुर सिंह समरजङ्ग, नेकपा अध्यक्ष लोकनारायण सुवेदी, नेकपा ऋषि कट्टेलका नेता आर बी भण्डारी, जसपा नयाँ शक्तिकी नेत्री हिसिला यमी, समाजवादी कम्युनिष्ट पार्टी नेपालका स्थायी समिति सदस्यहरू माधव गौतम, राजनीतिक विश्लेषक प्रा.डा. सुरेन्द्र केसी, समालोचक प्रा.डा. हेमनाथ पौडेल, सहिद आयामकी जीवन सँगिनी सरला रेग्मी, नारायण शर्मा कमलप्रसाद, पुष्पलाल अध्ययन समाजका अध्यक्ष लोककृष्ण भट्टराई लगायता नेता सहभागी हुने सुवेदीले जानकारी दिए ।
तीन दिन कृष्णलाल, गङ्गालाल र पुष्पलालमा समर्पित गरिने सुवेदीले बताए । रामेछापमा पुष्पलाल भौतिकवादी विचार विश्व विद्यालय स्थापनाको पहलका लागि कार्यक्रम आयोजना गर्न लागिएको उनले बताए । कृष्णलाललाई राज्यको तर्फबाट प्रथम साहित्यका सहिद घोषणा गराउन दबाब दिनको लागि पनि यो कार्यक्रम आयोजना गर्न लागिएको उनले जानकारी दिए ।
