मकवानपुरगढी - उच्च अदालत पाटन इजलासले चालु आर्थिक वर्षको चैत पहिलो सातासम्ममा ५८.९३ प्रतिशत मुद्दा फर्स्योट गरेको छ । चालु आव २०८१/८२ को यस अवधिमा ८०५ थान मुद्दा फर्स्योट गरेको अदालतका उपरजिस्ट्रार केशरनाथ अर्यालले जानकारी दिए ।
अघिल्लो आवबाट जिम्मेवारी सरेर आएका ३७४ र चालु आवमा हालसम्म दर्ता भएका ९९२ गरी एक हजार ३६६ थान मुद्दामध्ये ८०५ थान मुद्दा फर्स्योट भएका हुन् । अर्यालका अनुसार ५६१ थान मुद्दा हेर्न बाँकीमा राखिएको छ ।
इजलासमा रहेको उच्च अदालत पाटनमा एक वर्ष नाघेका मुद्दा ३५ थान रहेका छन् भने सोमाथिका सबै मुद्दा फर्स्योट भइसकेका छन् । यस चालु आवमा एक हजार आठ सय नयाँ मुद्दा दर्ता हुने अनुमान गरिएको छ। उपरजिस्ट्रार अर्यालका अनुसार चालु आवमा एक हजार १४५ फर्स्योट गर्ने लक्ष्य लिइएकामा ३४० थान मुद्दा फर्स्योट हुन बाँकी रहेका छन् ।
अदालतमा जिल्लाबाट पुनरावेदन भई आएका सरकारीवादी फौजदारी मुद्दा सबैभन्दा धेरै लगत भएका छन् । त्यस्तै दुनियाँवादी देवानी र दुनियाँवादी फौजदारी मुद्दा दर्ता हुने गरेका छन् । सबैभन्दा धेरै लागुऔषध, बैङ्किङ कसुर/चेक अनादर, सम्बन्धविच्छेद, राजस्वलगायतका हेर्ने गरेको उपरजिस्ट्रार अर्यालले बताए ।
