रौतहट - रौतहटमा जंगली बँदेल मार्न राखिएको विद्युतीय पासोमा करेन्ट लागेर एकजना महिलाको मृत्यु भएको छ। मृतक महिलाको शव लुकाएको अभियोगमा तीन जनालाई प्रहरीले पक्राउ गरेको छ।

जिल्लाको उत्तर पूर्वीभेग वृन्दावन नगरपालिका -१ बलेरी गाउँ छेउमा जंगली बँदेल मार्न राखेको विद्युतीय पासोमा करेन्ट लागेर महिलाको मृत्यु भएपछि मृतक महिलाको शव लुकाउने तीन जनालाई प्रहरीले पक्राउ गरेको हो।

जिल्ला प्रहरी प्रमुख एसपी दिलीप घिमिरेले गाउँकै केही मानिसले जंगली बँदेल मार्न मकैबारीमा थापेको जेआइ विद्युतीय तारको पासोमा करेन्ट लागेर स्थानीय रूपनारायण राउतको श्रीमती ५५ वर्षीया देवी पटेलको एकसाता अघि मृत्यु भएको जानकारी दिए । 

करेन्ट लागेर महिलाको मृत्यु भएपछि पासो थाप्नेहरूले घटना लुकाउन नजिकै जङ्गलमा खाल्डो खनी शव पुरेका थिए। घटनापछि महिला बेपत्ता भएको पीडित परिवारमार्फत जानकारी भएपछि इलाका प्रहरी कार्यालय गरुडाको टोलीले अनुसन्धान थालेको थियो ।

डिएसपी राजन कार्कीका अनुसार गत १४ गते देखि महिला बेपत्ता भएपनि प्रहरीमा १९ गते जानकारी आएको थियो। अनुसन्धानको क्रममा मृतक महिलाको शव बिहीबार अपरान्ह जंगलमा गाडिएको अवस्थामा बरामद भएको हो । 

साथै, घटनामा संलग्न रहेको आशंकामा तीन जनालाई नियन्त्रणमा लिएको छ । उनीहरू ईलाका प्रहरी कार्यालय गरुडाको हिरासतमा रहेका छन्। मृतकको शव पोष्टमार्टमका लागि प्रादेशिक अस्पताल गौरमा पठाईएको डिएसपी कार्कीले जानकारी दिए । 

एकसाता देखि गाडिएको मृतक महिलाको शव कुहिन सुरु भएको छ। अनुसन्धानपछि घटनाबारे पूर्ण जानकारी आउने ईलाका प्रहरी कार्यालय गरुडाले जनाएको छ