सिन्धुपाल्चोक - नेपाली कांग्रेस सिन्धुपाल्चोकको भातृ संगठन नेपाल तामाङ संघको अध्यक्षमा क्षेत्र बहादुर तामाङ चयन भएका छन् । तामाङ इन्द्रावती गाउँपालिका वडा नम्बर ४ का वडाध्यक्ष समेत हुन् ।

बिहीबार जिल्लाको पार्टी कार्यालयमा भएको प्रथम अधिवेशनले तामाङको अध्यक्षतामा कार्यसमिति चयन गरिएको छ। उपाध्यक्षमा वीर बहादुर तामाङ पख्रिन ,वीर बहादुर स्याङतान, सचिवमा विक्रम बहादुर तामाङ कोषाध्यक्षमा शेर बहादुर तामाङ चयन भएका छन्।

सहसचिवमा भने लाक्पासागर लामा र तेज बहादुर तामाङ चयन हुँदा सदस्यहरूमा भने सदस्यहरूमा :सुमित्रा तामाङ ,कामना तामाङ,रेशम ब तामाङ ,सन्तोष तामाङ ,सचिन तामाङ ,राजु तामाङ ,निरज लामा,जमुना तामाङ ,सुकुमाया तामाङ ,पदम ब तामाङ सर्वसम्मत चयन भएको छ।

कार्यक्रमलाई सम्बोधन गर्दै सिन्धुपाल्चोक जिल्लाका सभापति जंगबहादुर लामाले तामाङ संघ जन्मेको १८ वर्षपछि बल्ल आज अधिवेशन भएकोले यो  ऐतिहासिक दिन भएको बताए। तर १८ वर्षसम्म संगठन नबन्दा नेतृत्व विकास नभएकोमा उनले दुखेसो समेत पोखे।

तामाङ संघको स्थापनले पार्टीलाई थप उचाइमा पुर्याउने विश्वासका साथ सिन्धुपाल्चोकमा कांग्रेसलाई ८४ को चुनावमा पहिलो र बलियो बनाउन अब भातृ संघ संस्थाहरू जुरमुराएको सभापति लामाले बताए।

कार्यक्रमलाई सम्बोधन गर्दै महासमिति सदस्य एवम् इन्द्रावती गाउँपालिकाका पूर्वअध्यक्ष वंशलाल तामाङले  देश विकासमा तामाङहरूको ठूलो भूमिका रहेको बताउँदै  सबै जातजाति संवैधानिक अधिकार प्राप्त गर्न भए पनि संगठनमा आबद्ध हुनुपर्ने बताए । नेतृत्व प्राप्त गर्न प्रयास गर्न र एकताबद्ध हुन जरुरी रहेको बताउँदै तामाङहरूले शैक्षिक योग्यताको क्षमतालाई बढाउनुपर्नेमा उनको जोड थियो।

कार्यक्रमलाई सम्बोधन गर्दै पूर्व जिल्ला सचिव एवम् महाधिवेशन प्रतिनिधि बिल बहादुर तामाङले कार्यक्रममा उपस्थिति उल्लासमय ऊर्जा देख्दा खुशी व्यक्त गर्दै तामाङ संघ गठनले पार्टीलाई थप उचाइमा पुर्याउने विश्वास राखे। लोकतान्त्रिक राज्य व्यवस्था मा सबै जातजातिको समान भूमिका रहने बताउँदै देशमा राजावादीको अराजक गतिविधि प्रति आक्रोश पोखे।

यता नेपाल तामाङ संघका केन्द्रीय सदस्य विश्वकल्याण लामाले तामाङ संघ मण्डलेहरूको संघ नभई लोकतान्त्रिक पद्धतिबाट तामाङ समुदायलाई राजनीतिमा प्रतिनिधि गराउने प्लेटफर्म भएको बताए।

त्यस्तै सिन्धुपाल्चोक आदिवासी जनजाति जिल्ला समन्वय परिषद्का अध्यक्ष  थुप्तेन ग्याल्बो लामाले राज्यले हामीलाई पेलेको बताउँदै तामाङहरू अझै  न्यायपालिका, व्यवस्थापिक र कार्यपालिकामाले प्रतिनिधित्व गर्नुपर्ने जोड थियो।

कार्यक्रम लाई सम्बोधन गर्दै तामाङ संघ बागमती प्रदेशका अध्यक्ष बिमल मोक्तानले सिन्धुपाल्चोक जिल्ला तामाङहरूको बाहुल्यता जिल्ला भएको बताउँदै ८४ को निर्वाचनमा तामाङ जातिलाई जिताउन अनुरोध गरे।

अध्यक्षमा चयन भएपछि संघका अध्यक्ष क्षेत्र बहादुर तामाङले  जिम्मेवार कुशलताको साथमा भूमिका निर्वाह गर्ने प्रतिबद्धता जनाए। कांग्रेसलाई मजबुत बनाउन तामाङ संघ लाई सक्रिय बनाउने प्रतिबद्धता जनाए। तामाङ संघलाई जागरूक बनाउन अग्रसर हुने समेत उनले बताए।