काठमाडौं - टोखामा भेटिएको २५ करोड बराबरको विदेशी रकमको मालिक सिन्धुपाल्चोकका नारायण पौडेल भएको पत्ता लागेको छ । राजस्व अनुसन्धान विभागका महानिर्देशक चण्डीप्रसाद घिमिरेले भोटेकोशीका-४ का पौडेल २५ करोडको मालिक भएको पत्ता लागेको बताए ।
विभागले उक्त रकमको बारेमा अनुसन्धान गर्ने क्रममा ट्रकका चालक कुसान लामासँग निरन्तर फोन सम्पर्कमा रहेका पौडेलसँगको 'कनेक्सन' पत्ता लगाएको हो । उनको कनेक्सन पुष्टि हुने प्रमाण भेटिएपछि राजस्वको टोलीले पौडेलको टोखामा रहेको घरमा छापा मारेको थियो।
पौडेल भने फरार रहँदै आएका छन्। उनीविरुद्ध जिल्ला अदालतबाट पक्राउ पूर्जीसमेत जारी भएको छ ।
ट्रकको बनोटमा फल्स बटम बनाएर लुकाएर राखिएको अवस्थामा भेटिएको यूरो र अमेरिकी डलरसहित चालक लामालाई प्रहरीले पक्राउ गरेको थियो।
उपत्यका अपराध अनुसन्धान कार्यालयको टोलीले विशेष सूचनाको आधारमा काठमाडौंबाट चीनको नाकातर्फ जाँदै गरेको अवस्थामा २५ करोड रुपैयाँसहित लामालाई चैत ४ गते पक्राउ गरेको थियो।
