सिन्धुपाल्चोक - बागमती प्रदेश सामाजिक विकास मन्त्रालय सामाजिक विकास कार्यालय धुलिखेल र इन्द्रावती गाउँपालिकाको साझेदारीमा गृहिणी महिला सशक्तीकरण कार्यक्रम अन्तर्गत आधारभुत कटाई सिलाई सीप विकास तालिम बिहीबारबाट इन्द्रावती गाउँपालिका वडा नम्बर ४ नवलपुरमा सुरु हुने भएको छ।
बुधबार वडा कार्यालयको हलमा औपचारिक कार्यक्रमको बीच भोलिबाट आधारभुत कटाई सिलाई तालिम संचालन गर्न लागेको इन्द्रावती गाउँपालिका वडा ४ का सचिब मदन कुमार भट्टराईले जानकारी दिए।
कार्यक्रमलाई सम्बोधन गर्दै इन्द्रावती गाउँपालिकाकी उपाध्यक्ष शोभाना तामाङले सिलाईबुनाई तालिम लिएपछि त्यसलाई निरन्तरता दिन अनुरोध गरिन् । उपाध्यक्ष तामाङले पालिका भरी सिलाई बुनाई तालिम लिएर कतिपय गुपचुप भएर बसेको देखेकोले तालिमलाई निरन्तरता दिई व्यवसायिक रुपमा परिमार्जन गर्न अनुरोध गरिन्।
त्यस्तै इन्द्रावती गाउँपालिकाका प्रमुख प्रशासकीय अधिकृत पुर्णप्रसाद दुलालले तालिमबाट महिलाहरुलाई उद्यमी बन्न सफल हुने विश्वास राख्दै टेलर चलाउन सक्ने क्षमता अभिवृद्धि हुने बताए। दुलालले व्यवसायी सीपमा निपुण हुनको लागि तालिमको आयोजना गरेको बताउँदै उन्नति र प्रगति संघर्ष नगरेसम्म सफलता प्राप्त नहुने उनको तर्क थियो।
त्यस्तै वडा नम्बर ४ का वडाध्यक्ष क्षेत्र बहादुर तामाङले गृहिणी महिलाहरुलाई सिलाइ बुनाइमा सक्षम बनाएर त्यसलाई व्यवसायीकरण र सशक्तीकरण गरि जिविकोपार्जनलाई समेत सहज बनाउने उदेश्यले तालिमको आयोजना गरिएको बताए। कटाई सिलाई तालिममा मात्रै सिमित नहोस् तालिमको अवधि भित्र अनुशासनमा बसेर सद्भाव कायम राखेर तालिममा सहभागी हुन तामाङले अनुरोध गरे। भोलि देखि सुरु हुने तालिममा माया तामाङ र सचिना भट्टराईले प्रशिक्षण दिनेछन् ।
