काठमाडौं - काठमाडौं विश्वविद्यालय (केयु)का प्राध्यापक कृतिमान शाक्यले आर्ट भविष्य र विगतका कुराहरू जोड्ने ‘कनेक्सन’ भएको बताएका छन् । केयु आर्टस अफ डिजाइन विभागका प्राध्यापक शाक्यले आर्टले भोलिका दिनमा कसरी अगाडि बढ्न सकिन्छ बाटो तय गर्ने बताए । ‘नयाँ जेनेरेसनले कसरी आफूलाई प्रस्तुत गर्न खोजेको छ भन्ने देखाउँछ’, उनले भने, ‘अहिलेका विद्यार्थीहरूले मौलिक कुराहरूलाई कसरी लिन्छन् र त्यसलाई कसरी आर्टहरूमार्फत देखाउँछन् भन्ने नै हो ।’
आर्टले कुराहरू व्यवस्थापन गर्न सिकाउने पनि शाक्यको धारणा छ । ‘कन्सेप्टमा भएका आइडियाहरूलाई दृश्यका रूपमा उतार्ने काम आर्टसले गर्छ’, उनले भने, ‘कति कुरा हाम्रो मनमा हुन्छ तर त्यसलाई भन्न वा व्यक्त गर्न सकिदैंन । त्यस्ता कुराहरू आर्टमार्फत पस्किन सकिन्छ ।’
उनले आर्टलाई क्यारियर बनाएर लान सकिने बताए । अन्त भन्दा नेपालमा यसको क्षेत्र राम्रो रहेको उनको भनाइ छ । पाटन, भक्तपुर र जनकपुरलगायत क्षेत्रमा आर्टलाई आफ्नो पेशा बनाइरहेको उनले बताए । ‘आर्ट वा डिजाइन गर्दा आफ्नो मौलिकतालाई भुल्न हुँदैन’, शाक्य भन्छन्, ‘मौलिकताहरूबाट राम्रो आर्ट बनाउन सकिन्छ । केयुले प्रत्येक वर्ष नेपाल आर्ट काउन्सिल बबरमहलमा आर्ट प्रदर्शनी गर्ने गर्दछ ।’
केयु आर्टस अफ डिजाइन फ्याकल्टीका विद्यार्थीको आर्ट प्रदर्शनी बबरमहलमा भइरहेको छ । सो प्रदर्शनी भोलिसम्म रहनेछ। इन्टिग्रेड प्रोजेक्ट अन्तगर्त विद्यार्थीले बनाएका आर्टहरू प्रदर्शनी र बिक्रीमा रहेका छन् ।
