तनहुँ - डिभिजन वन कार्यालय तनहुँले डढेलो रोकथामका लागि जिल्लामा विशेष अभियान सुरु गरिएको छ । डढेलोले जनधन, वन र जैविक विविधता तथा पारिस्थितिक प्रणालीमा समेत क्षति गर्ने भएकाले न्यूनीकरण गर्न अभियान सञ्चालन गरिएको हो । जिल्लाको १० वटै पालिकामा अभियान सञ्चालन गर्ने निर्णय भएको कार्यालयले जनाएको छ ।
जस अन्तर्गत आँबुखैरेनी, देवघाट गाउँपालिका, म्याग्दे, घिरिङ, बन्दीपुर गाउँपालिका र भानु नगरपालिकामा डढेलो नियन्त्रण अभियान सञ्चालन गरिसकिएको छ । जिल्लाका अन्य स्थानीय तहमा समेत डढेलो नियन्त्रण अभियान सञ्चालन गर्ने तयारी भइरहेको छ ।
यस पटक हिउँदमा पानी नपरेकाले सुक्खा धेरै भएको र यस मौसममा हावाहुरी चल्ने भएकाले अधिकांश वनडढेलोको उच्च जोखिममा रहेकाले विशेष अभियान सञ्चालन गरिएको वन अधिकृत नवीन विश्वकर्माले बताए ।
डिभिजन वन कार्यालयको आयोजनामा दमौलीमा गरिएको डढेलो नियन्त्रण तथा व्यवस्थापन समितिको बैठकले विशेष अभियान सञ्चालन गर्ने निर्णय अनुसार अभियान सञ्चालन गरिएको विश्वकर्माले बताए । अभियान अन्तर्गत वन डढेलो सचेतना सप्ताह कार्यक्रम सञ्चालन गरिने भएको छ ।
