बर्दिया - मधुवन नगरपालिका-३ मा रहेको धनौराबाट नाबालकलाई सीमापार जान रोक लगाइएको छ । पछिल्लो समय भारतबाट लागूऔषध भित्रिने क्रम बढ्दै जान थालेपछि र सो नाकाबाट मानव बेचबिखनसमेत हुन सक्ने भएको भन्दै नाबालकलाई सीमापार जान रोक लगाइएको हो ।
उक्त नाकाबाट भारततर्फ गई बालबालिका लागूऔषधको दुर्व्यसनीमा फस्न सक्ने भएकाले १६ एक वर्षमुनिका बालबालिकालाई एक्लै सीमापारको बजार जानबाट रोक लगाइएको मधुवन नगरपालिका-३ का वडाध्यक्ष नारायण मल्लले बताए ।
नेपाल प्रहरीको धनौरा चेक पोस्टले आयोजना गरेको सर्वपक्षीय बैठकबाट एक्लै गएका १६ वर्षमुनिका बालबालिका सबैलाई रोक्ने र अभिभावकसँग गए जान दिने निर्णय भएको वडाध्यक्ष मल्लले बताए ।
ओराली बजारको धनौरा हुँदै भारतको बठनियाँ बजार पुगेर युवाहरू फर्किँदा धेरै कुलतमा फस्दै गएको लिए अनुमान स्थानीयले गरेको र कुलत र बेचबिखनको समस्या नहोस् भनेर सीमाबाट १६ वर्षमुनिका बालबालिकालाई एक्लै भारततर्फ जान नदिने गरी सर्वपक्षीय निर्णय गरी रोक लगाइएको जिल्ला प्रहरी कार्यालय बर्दियाका प्रहरी उपरीक्षक केदार खनालले बताए ।
