विराटनगर - विराटनगरका उद्योगी मोती दुगडले सेन्चुरियनको भौतिक संरचना निर्माण १० वर्षअघि निर्माण सुरु गरेको होटल सम्पन्न नहुँदै बिक्री भएको छ । पूर्वराज्यमन्त्रीसमेत दुगडले भाटभटेनी सुपर मार्केटका प्रबन्ध निर्देशक मीनबहादुर गुरुङलाई निर्माणाधीन होटल सेन्चुरियन बिक्री गरेका हुन् ।
दुगड नेकपा एमालेका नेतासमेत हुन् । उनले १० वर्षअघि होटल निर्माण सुरु गरेका थिए । गुरुङले १ अर्ब ५५ करोड रुपैयाँमा खरिद गरेका हुन् । देशभर सुपरस्टोर खोल्दै आएको भाटभटेनी समूहले होटल क्षेत्रमा पनि हात हालेको हो । सेन्चुरियनलाई पाँच तारे होटलको रूपमा सञ्चालन गर्ने तयारी गुरुङको छ ।
गुरुङले काठमाडौंमा होटल स्क्वायर तयार गरिरहेका छन् । उमेश श्रेष्ठसँगको साझेदारीपछि काठमाडौं स्क्वायरमा लगानी गरेका उनले विराटनगरमा होटल सेन्चूरियन खरिद गरेका हुन् । गुरुङले होटल खरिदका लागि बैना भएको बताएका छन् । व्यवसायी गुरुङले ५ तारे होटलसहित, मल र इन्टरटेनमेन्ट पार्कसमेत सञ्चालन गर्ने उद्देश्यले होटल सेन्चुरियनको खरिद गरेको बताए ।
होटल कम्पाउन्डमा ३ वटा छुट्टाछुट्टै भवन निर्माणाधीन छन् । सबैभन्दा ठूलो भवनमा बेसमेन्टसहित १० तला छन् । कुल १ बिघा ४ कट्ठाको कम्पाउन्डमा पार्किङ क्षेत्र छ।
