नेपिडाउ – भूकम्पले म्यान्मा र थाइल्याण्डमा शुक्रबार गएको भूक्मपमा परी मर्नेको संख्या १४४ पुगेको छ ।
शुक्रबार दिउँसो सागिङ सहरको उत्तरपश्चिम केन्द्रबिन्दु बनाएर गएको ७.७ म्याग्निच्युडको कम्पन र त्यसपछिको ६.४ म्याग्निच्युडको परकम्पनले १४४ जनाको ज्यान लिएको बीबीसीले जनाएको छ । भूकम्पम परी ७३२ जना घाइते भएका छन् ।
सडक चिरेका छन्, पुल ढलेका छन् र बैङ्ककसम्मको गगनचुम्बी भवन भत्किएको छ। म्यान्माका धेरै भागहरूमा मानवीय संकट गहिरिँदै गएको छ। राजधानी नेपिडाउका अस्पतालहरूमा उपचारको चाप बढ्दो छ।
गृहयुद्धग्रस्त म्यान्माका सैन्य नेता मिन आङ ह्लिङले राष्ट्रलाई सम्बोधन गर्दै मृतक संख्या अझै बढ्न सक्ने चेतावनी दिए। उनले अन्तर्राष्ट्रिय समुदायलाई "जो सुकै, जहाँबाट सुकै – सहयोग गर्न आउनुहोस्" भन्दै देशमा राहतका लागि ढोका खोलिएको घोषणा गरे।
थाइल्याण्डमा पनि भूकम्पको प्रभाव परेको छ। हालसम्म तीन जनाको मृत्यु पुष्टि गरिएको छ भने राजधानी बैङ्ककमा निर्माणाधीन ३० तले भवन भत्किएको छ।
