नुवाकोट - विदुर नगरपालिकाले क्षयरोग अन्त्य गर्ने प्रतिबद्धता जनाएको छ । विश्व क्षयरोग दिवसको अवसरमा सोमबार विदुर नगरपालिका स्वास्थ्य शाखाको आयोजनामा भएको कार्यक्रममा सरोकारवालाहरूले यस्तो प्रतिबद्धा जनाएको हुन् । विदुरका प्रमुख प्रशासकीय अधिकृत सुभाकर पौडेलको अध्यक्षतामा भएको कार्यक्रममा "हो! हामी क्षयरोग अन्त्य गर्न सक्छौं" भन्ने सन्देश व्यवहारमा उतार्ने विश्वास व्यक्त गरिएको छ ।
कार्यक्रममा क्षयरोग विरुद्धको सशक्त प्रतिबद्धता, लगानी र सेवा प्रवाह सुनिश्चितताको महत्त्वलाई बलियो रूपमा उठान गरिएको विदुर नगरपालिका स्वास्थ्य शाखा प्रमुख रामराजा भण्डारीले जानकारी दिए । कार्यक्रमको विशेष आकर्षण क्षयरोग सन्देशमूलक नाटक प्रतियोगिता रहेको उनले बताए । जसले समुदायमा चेतना फैलाउने प्रभावकारी भूमिका खेलेको छ।
साथै नेसनल टिबी प्रिभेन्टिङ प्रोटोकल २०२४ का अनुसार टिबी प्रिभेन्टिङ ट्रिटमेन्ट (टिपिटि)को सुरुवात गरिएको भण्डारीले जानकारी दिए । जसले क्षयरोग न्यूनीकरणको यात्रामा एक महत्वपूर्ण मोड थपेको उनले बताए ।
पालिकाका उप–प्रमुख प्रभा बोगटीको प्रमुख आतिथ्यतामा भएको कार्यक्रममा सामाजिक विकास समिति संयोजक तथा वडा नं. १ का वडाध्यक्ष लेनिन रञ्जित, वडा नं. २ का वडाध्यक्ष दीपक कायस्थ, वडा नं. ९ का वडाध्यक्ष हरेराम भण्डारी, वडा नं. १२ का वडाध्यक्ष उपेन्द्र खड्का, योजना आयोग प्रमुख हरि प्रसाद प्याकुरेल, कार्यपालिका सदस्यहरू, स्वास्थ्य शाखाका कर्मचारी, सम्पूर्ण स्वास्थ्य संस्था प्रमुख र महिला स्वास्थ्य स्वयंसेविका तथा पत्रकारहरूको उपस्थिति रहेको थियो।
