जनकपुर - धनुषामा क्षयरोगको अवस्था भयावह बन्दै गएको जनाइएको छ । सोमबार विश्व क्षयरोग दिवको अवसरमा जनकपुरधाममा आयोजित एक कार्यक्रममा जनस्वास्थ्य कार्यालय धनुषाका प्रमुख उमेश यादवले कोरोना महामारीपछि क्षयरोगको संख्यामा वृद्धि भएको जानकारी दिएका छन् ।
उनले विगत ६ महिनामा मात्र धनुषा जिल्लामा क्षयरोगका ७ सय ३४ बिरामी देखिएको बताए । मधेश प्रदेशभरिमै पर्सा जिल्लापछि सबैभन्दा बढी क्षयरोगको बिरामी धनुषामै रहेको जनाए । अहिले क्षयरोग महामारी जस्तै फैलिरहेको बताए ।
उनले कोरोना महामारीकै समयदेखि तीनै तहको सरकारले क्षयरोगलाई बेवास्ता गरेको आफूलाई अनुभव भएको सुनाए । उनले कहिले औषधी नपाउने, कहिले संघ, प्रदेश र स्थानीय तहले समन्वय नगर्ने, कहिले बिरामीले औषधीलाई निरन्तरता नदिनेलगायतका कारण अहिले क्षयरोगको स्थिति भयावह बनेको बताए ।
उनले धनुषाका जनकपुरधाम उपमहानगरपालिका, लक्ष्मिीनिया गाउँपालिका, बटेश्वर गाउँपालिका, मिथिला नगरपालिका र सहिदनगर नगरपालिकामा क्षयरोग नियन्त्रणका लागि विशेष कार्यक्रमहरू सञ्चालनमा रहेको जानकारी दिए ।
यी पाँच पालिका सहित अन्य पालिकाहरूमा पनि निरन्तर खकार जाँच र डट्स प्रविधिबाट क्षयरोगको उपचार हुने गरेको प्रमुख यादवले जनाए ।
