धनकुटा - धनकुटा नगरपालिकाले समयमा लेखा परीक्षण नबुझाउने, साधारणसभा नगर्ने नगरपालिकामा सञ्चालित २३ सहकारीलाई कारबाही गर्ने चेतावनी दिएको छ ।
सहकारी ऐन २०७५ अनुसार नगरपालिकामा दर्ता भएका सहकारी संस्थाले प्रत्येक आर्थिक वर्ष समाप्त भएको ६ महिनाभित्र साधारणसभा गर्नुपर्ने र आर्थिक वर्ष समाप्त भएको ३ महिनाभित्र लेखा परीक्षण प्रतिवेदन बुझाउनुपर्ने प्रावधान उल्लंघन गर्ने सहकारीलाई कारबाही गर्ने जनाएको हो ।
नगरपालिकामा सञ्चालित २३ वटा सहकारी संस्थाले नियम अनुसार साधारणसभा र लेखापरीक्षण गरेको विवरण नबुझाएकाले १५ दिन भित्र सम्पूर्ण कागजात बुझाउन सूचना जारी गरिएको प्रमुख प्रशासकीय अधिकृत दशरथ राईले जानकारी दिए ।
निर्धारित समयमा साधारणसभा नगर्ने तथा लेखा परीक्षण नबुझाउनेमा ८ वटा बचत तथा ऋण सहकारी, २ वटा बहुउद्देश्यीय सहकारी, २ वटा दुग्ध सहकारी, १ वटा उपभोक्ता सहकारी, १ वटा खेलकुद सहकारी, ९ वटा कृषि सहकारी रहेको नगरपालिकाकाले जनाएको छ ।
