कास्की - पोखराको पृथ्वीनारायण क्याम्पसको स्वतन्त्र विद्यार्थी युनियन (स्ववियु) निर्वाचन आइतबार हुने भएको छ ।
निर्वाचन समिति, क्याम्पस प्रशासन र निर्वाचनमा भाग लिएका विभिन्न संघ, संगठन, प्यानल र स्वतन्त्र उम्मेदवारसहित बसेको सर्वपक्षीय बैठकले स्थगित निर्वाचन चैत १० गते बिहान आठ बजेदेखि गर्ने निर्णय गरेको हो ।
निर्वाचन समिति संयोजक प्राडा रामचन्द्र पोखरेलले विज्ञप्ति जारी गरी १० गते बिहान ८ बजेबाट दिउँसो ४ बजेसम्म क्याम्पसपरिसरभित्र मतदान हुने जानकारी दिएका छन् । यहाँ नौ हजार २७० जना विद्यार्थी मतदाता रहेका छन् । पृथ्वीनारायण क्याम्पसमा मङ्गलबार निर्वाचन समितिले छापेको मतपत्रमा अखिल छैटौँका उम्मेदवारको सूची नदेखिएपछि विवाद हुँदा चुनाव स्थगित भएको थियो ।
२०६५ सालपछि हुन लागेको पिएनको २२ औँ स्ववियु अध्यक्षका लागि स्वतन्त्रसहित आठ जना अध्यक्षका उम्मेदवार प्रतिस्पर्धामा छन् ।
