काभ्रे - जिल्ला प्रहरी कार्यालय काभ्रेपलाञ्चोक अन्तर्गत रहेका दुई प्रहरी चौकी निर्माणका लागि जग्गा प्राप्ति भएको छ। काभ्रेपलाञ्चोकका प्रमुख जिल्ला अधिकारी उमेशकुमार ढकाल, प्रमुख मालपोत अधिकृत दीपक कोइरालाले जिल्ला प्रहरी प्रमुख प्रहरी उपरीक्षक वसुन्धरा खड्कालाई प्रहरी चौकी पोखरी नारायणस्थान र प्रहरी चौकी भकुण्डेबेसौँका लागि जग्गा भोगाधिकार प्रमाणपत्र हस्तान्तरण गरेका हुन्।

तेमाल गाउँपालिका -५ स्थित जिल्ला प्रहरी अन्तर्गतको प्रहरी चौकी पोखरी नारायणस्थानलाई नेपाल सरकारको नाममा कायम रहेको कित्ता नम्बर ४६३ को ६ रोपनी जग्गा प्रयोग गर्न दिने निर्णय गरेको थियो। त्यसै गरी मन्त्रिपरिषद्को बैठकले जिल्ला प्रहरी मातहत रहेको प्रहरी चौकी भकुण्डेका लागि नमोबुद्ध नगरपालिका-४ स्थित कित्ता नम्बर ८५ को ६ रोपनी सार्वजनिक जग्गा प्रयोग गर्न दिने निर्णय गरेको थियो।

जिल्ला प्रहरी प्रमुख खड्काले दुई चौकीका लागि आवश्यक पर्ने जग्गाका लागि चालु आर्थिक वर्षको सुरुवातदेखि जग्गा हेर्ने काम भएको बताइन्। प्रहरी उपरीक्षक खड्काले जङ्गलछेउमा रहेको प्रहरी चौकी पोखरी नारायणस्थानलाई पालिकानजिक सार्नका लागि तेमाल गाउँपालिकाले १० लाख विनियोजन गरी चारकोठे अस्थायी भवन निर्माणको काम सुरु गरेको बताइन्।