दाङ - शनिबार बिहानको समय एक युवाका लागि अन्तिम बन्न पुग्यो। दाङको घोराहीमा दुई मोटरसाइकल एक आपसमा ठोक्किँदा तुलसीपुरका २२ वर्षीय विवेक सुवेदीको ज्यान गएको छ।

दुर्घटना बिहान घोराही उपमहानगरपालिका-१६, गुर्जे खोलामा भएको हो। रा ८ प ३४१ नम्बरको मोटरसाइकल घोराहीबाट तुलसीपुरतर्फ जाँदै थियो भने रा २ प ६१६३ नम्बरको अर्को मोटरसाइकल तुलसीपुरबाट घोराहीतर्फ आइरहेको थियो। ती दुई सवारी साधन एक आपसमा ठोक्किँदा सुवेदी गम्भीर घाइते भएका थिए।

जिल्ला प्रहरी कार्यालय दाङका प्रवक्ता डिएसपी चक्रबहादुर शाहका अनुसार घाइते सुवेदीलाई तुरुन्तै राप्ती स्वास्थ्य विज्ञान प्रतिष्ठान, घोराहीमा लगिएको थियो। तर, उपचारका क्रममा उनको निधन भएको पुष्टि भएको छ। 

२२ वर्षे उमेरमै परिवारको सहारा गुमाउनु परेको पिडाले सुवेदीको घरमा शोकको वातावरण छाएको छ। स्थानीयस्तरमा समेत दुर्घटनाले दुःख र चिन्ताको वातावरण बनाएको छ। 

प्रत्येक दिनजसो सवारी दुर्घटनाका घटनाहरू दोहोरिनु अब गम्भीर चिन्ताको विषय बनेको छ। गति, लापरवाही र ट्राफिक नियमको उल्लङ्घन आजको दुर्घटनाको सम्भावित कारण हुनसक्ने अनुमान गरिएको छ।