भक्तपुर - भक्तपुरको चाँगुनारायणमा नेपालकै सबैभन्दा अग्लो बसेको १०८ फिटको कल्पेश्वर महादेव मूर्ति निर्माण गरी प्रतिष्ठापन गरिने भएको छ। चाँगुनारायण नगरपालिका वडा नं ८ कलमसी क्षेत्रमा मूर्ति निर्माण गरी प्राणप्रतिष्ठानलाई पूर्णता दिइने भएको हो।
पहिलादेखि नै सुरु भई निर्माण सम्पन्न हुन बाँकी महादेवको मूर्ति निर्माण तथा प्राणप्रतिष्ठाका लागि आर्थिक सहयोग जुटाउने उद्देश्यका साथ त्यहाँ शिवपुराण महायज्ञ पनि सञ्चालन गरिने भएको छ । महायज्ञ २०८२ वैशाख २ गतेदेखि १३ गतेसम्म हुने जनाइएको छ।
नगरकोट भ्रमण वर्ष २०८२ को अवसरमा धार्मिक पर्यटनलाई सँगसँगै लैजाने उद्देश्यअनुरूप मूर्ति प्राणप्रतिष्ठा गर्न लागिएको भक्तपुरको चाँगुनारायण नगरपालिका वडा नं ८ का वडाध्यक्ष एवं महायज्ञ तयारी समितिका संयोजक जनक खत्रीले जनाए।
बिहीबार भक्तपुर मा आयोजित पत्रकार सम्मेलनमा उनले १०८ फिट अग्लो कल्पेश्वर महादेवको मूर्ति निर्माण तथा स्थापनामा आर्थिक सहयोग जुटाउने उद्देश्यले महायज्ञ गर्न लागेको जानकारी गराए। महायज्ञपछि प्राप्त हुने आर्थिक सहयोगबाट कामले पूर्णता पाउने विश्वास उनले व्यक्त गरे।
कल्पेश्वर महादेव मूर्ति निर्माणाधीन स्थल भक्तपुर जिल्लाको चाँगुनारायण नगरपालिका वडा नं ८, ९ र काभ्रपलान्चोक जिल्लाको बनेपा नगरपालिका वडा नं १ को संगमस्थलको रुपमा रहेको छ। यो ठाउँ नगरकोट भ्यु टावरबाट नजिकै रहेको छ।
साथै, पर्यटकहको चाप रहिरहने बोजिनी ड्याम्पनजिकै पनि छ। यो ठाउँबाट काठमाडौं उपत्यकालगायत नाला, बनेपा, धुलिखेलसम्मको दृश्य अवलोकन गर्न सकिने उच्च स्थानमा रहेको छ।
