सिन्धुपाल्चोक - हेलम्बु गाउँपालिकाको जग्गा सम्बन्धी एउटा समाचारले  बुधबार दिनभर सामाजिक सञ्जाल तात्यो । स्थानीय तहमा सञ्चालनमा राम्रो छवि बनाएका हेलम्बु गाउँपालिकाका अध्यक्ष निमाग्याल्जेन  शेर्पामाथि धेरैले गाली बर्साए ।  

त्यसको एउटै कारण थियो भवन  निर्माणका लागि आवश्यक जग्गा व्यवस्थापनसम्बन्धी रिपोर्ट न्युज २४ को कल २४ मा प्रसारण भएको थियो । सो रिपोर्टमा गाउँपालिकाको प्रशासकीय भवन बनाउन व्यवस्थापन भएको जग्गा हेलम्बुकै अध्यक्ष शेर्पाको नाममा रहेको र शेर्पाले गाउँपालिकाको भवन बनाउन बेवास्ता गरेको भन्ने आरोप थियो । 

त्यसको भोलिपल्ट बिहीबार हेलम्बुका अध्यक्ष निमाग्यालजेन  शेर्पाले उक्त समाचार भ्रामक भएको प्रतिक्रिया दिएका छन् । उनले सामाजिक सञ्जालमा स्टाटस लेख्दै राजनीतिक प्रतिशोधको रूपमा समाचार सम्प्रेषण गरेको भन्दै न्युज २४ माथि खनिएका हुन् ।

उनले पत्रकारलाई वास्तविकता बुझेर समाचार सम्प्रेषण गर्नसमेत आग्रह गरेका छन् । गाउँपालिकाको प्रशासकीय भवन बनाउन लिइएको जग्गा विभन्न दलहरूसहित बनेको समिति अन्तर्गत नै रहेको शेर्पाले स्पष्ट पारेका छन् । 

अध्यक्ष शेर्पाले फेसबुक मार्फत स्ट्याटस लेख्दै भनेका यसो भनेका छन:

हामी स्पष्ट पार्न चाहन्छौं कि:

जग्गा व्यवस्थापनसम्बन्धी वास्तविकता – उक्त जग्गा हेलम्बु-२, किउल निवासी एवं नेकपा (एमाले) सिन्धुपाल्चोकका जिल्ला उपाध्यक्ष अर्जुन भण्डारीका पिता ज्ञानबहादुर भण्डारीको संयोजकत्वमा गठित एक समिति अन्तर्गत रहेको छ। उक्त समितिमा नेपाली कांग्रेस, नेकपा (माओवादी केन्द्र) लगायतका राजनीतिक दलका प्रतिनिधिहरू समेत गरी कुल २६ जना सदस्यहरू रहेको जानकारी गराउन चाहन्छौं।

केही सञ्चारमाध्यमहरूले गलत रूपमा जग्गा गाउँपालिका अध्यक्ष निमा ग्याल्जेन शेर्पाको नाममा रहेको भनी समाचार सम्प्रेषण गरेका छन्, जुन पूर्णतः गलत र आधारहीन छ। वास्तविकता के हो भने, यो जग्गा उक्त समिति अन्तर्गत नै रहेको छ र जग्गा दाताहरूलाई वितरण गर्ने जिम्मेवारी पनि समितिकै हो।

राजनीतिक प्रतिशोधका रूपमा समाचार सम्प्रेषण – यो विषयलाई राजनीतिकरण गर्दै गलत उद्देश्यका साथ समाचार सम्प्रेषण गरिनु निन्दनीय छ। सार्वजनिक हितमा कार्य गर्ने सबै राजनीतिक दलका जिम्मेवार व्यक्तिहरूले मिलेर यसको समाधान खोज्नुपर्छ।

गाउँपालिकाको प्रशासकीय भवन निर्माण प्रक्रिया अघि बढ्दै – गाउँपालिकाको प्रशासकीय भवन निर्माण प्रक्रियालाई तीव्रता दिँदै टेंडर (ठेक्का) प्रक्रिया छिट्टै सुरू हुन लागेको छ। यसले गाउँपालिकाको सेवा प्रवाहमा सुधार ल्याउनुका साथै स्थानीय विकासमा महत्वपूर्ण योगदान पुर्‍याउनेछ।

गाउँपालिकाले एक रुपैयाँ पनि खर्च नगरी ५५ रोपनी जग्गा आफ्नो नाममा ल्याएको ऐतिहासिक उपलब्धि – नेपाल अधिराज्यभर कुनै पनि गाउँपालिकाले आफ्नो बजेटबाट एक रुपैयाँ खर्च नगरी यति धेरै जग्गा व्यवस्थापन गरेको उदाहरण बिरलै पाइन्छ। हेलम्बु गाउँपालिकाले कुनै खर्च नगरी ५५ रोपनी जग्गा आफ्नो नाममा ल्याउन सफल भएको छ, जुन गाउँपालिकाको ऐतिहासिक उपलब्धि हो। यस कार्यमा योगदान पुर्‍याउने सबै पक्षहरूलाई धन्यवाद दिन चाहन्छौं।

आगामी कदम – हामी सम्बन्धित पक्षहरूलाई आग्रह गर्न चाहन्छौं कि:

मिडियाले वस्तुनिष्ठ पत्रकारिता गर्दै सत्यतथ्य बाहिर ल्याओस्।

सम्बन्धित समिति र पालिका प्रशासनले जग्गा व्यवस्थापनको निकास शीघ्र निकालोस्।

स्थानीय बासिन्दाहरू तथा सरोकारवाला पक्षहरूले तथ्यहीन समाचारप्रति विश्वास नगरी सत्य तथ्य बुझ्न पहल गरून्।

प्रशासकीय भवन निर्माणको टेंडर प्रक्रिया छिट्टै सुरू हुन लागेको हुनाले सबै पक्षले सहकार्य गरी विकास कार्यलाई अगाडि बढाउन सहयोग गरून्।

गाउँपालिकाले ५५ रोपनी जग्गा निःशुल्क रूपमा व्यवस्थापन गरेको उपलब्धिलाई सबैले सकारात्मक रूपमा हेरी विकासको गति तेज पार्न योगदान दिऊन्।

यस सन्दर्भमा, हामी पुनः सबैलाई आग्रह गर्दछौं कि तथ्यहीन समाचारको पछि नलागी सत्यतथ्य बुझ्न र सार्वजनिक हितका लागि मिलेर काम गर्न सहकार्य गरौँ।

धन्यवाद।