काठमाडौं - लेखक एवम् उद्यमी जीवा लामिछानेको यात्रा संस्मरणात्मक तेस्रो कृति ‘अक्षत अन्टार्कटिका’ सार्वजनिक गरिएको छ। काठमाडौंको कमलादीस्थित नेपाल प्रज्ञा-प्रतिष्ठानको डबलीमा बुधबार आयोजित कार्यक्रममा लेखक जीवा लामिछाने र पत्रकार बसन्त बस्नेतले पुस्तक सार्वजनिक गरे ।
पुस्तकले अन्टार्कटिकाको सौन्दर्य, अनुसन्धान र वातावरणीय सन्देशलाई प्रभावकारी रूपमा प्रस्तुत गरेको पत्रकार बस्नेतले बताए। ‘यो पुस्तकको सरलता, भाषिक मिठास र उत्कृष्ट संयोजनले जोकसैलाई मोहनी लगाउँछ,’ उनले भने । लामिछानेका यसअघि प्रकाशित पुस्तकभन्दा यो फरक शैलीमा लेखिएको बस्नेतको भनाइ छ, ‘यसमा लेखकले
लेखनको फरक शैली अपनाउनुभएको छ’ उनले पनि भने । चिसो स्थानको कथा भए पुस्तक लेखनको न्यानोपन आभास गराउने बस्नेतको भनाइ छ ।
अन्टार्कटिका जानुअघि नै आफूले लेख्छु भनेर गएको र यात्राकै क्रममा २५ हजार शब्द लेखिसकेको लेखक जीवा लामिछानेले बताए। ‘म लेख्ने तयारीसाथ अन्टार्कटिका गएको थिएँ,’ उनले भने, ‘फर्किएर आएपछि केही स्रोतसामग्री अध्ययन गरें । र, पुस्तक लेखनलाई तीव्रता दिइहालें ।’ त्यसैले पनि एक वर्ष हाराहारीको समयमा पुस्तक ल्याउन सम्भव भएको लामिछानेले जनाए ।
‘अक्षत अन्टार्कटिका’ मा लेखक लामिछानेले सन् २०२४ जनवरी १३ देखि २४ सम्मको अन्टार्कटिका यात्राका अनुभव साझा गरेका छन् ।
