दाङ - दाङमा तीन महिनादेखि हवाइ सेवा बन्द रहेको छ । जिल्लाको एक मात्र टरिगाउँ विमानस्थलमा विमान आउन छाडेसँगै हवाइ सेवा बन्द भएको हो ।
उडान बन्द भएसँगै जिल्लाबासीले हवाइ सेवाका लागि नेपालगञ्ज वा भैरहवा जानुपर्ने बाध्यता छ ।

यहाँका नागरिकले हप्तामा २ दिन हवाइ सेवा पाउँदै आएका थिए । त्यसपछि हप्ताको १ दिन मात्र विमान आउने गरेको थियो । तर गत पुस २ गतेदेखि विमान अवतरण गरेको छैन । ३ महिनादेखि विमान सेवा बन्द हुँदा पनि कसैको ध्यान पुग्न सकेको छैन । नियमित उडान हुनुपर्ने भएपनि भएको उडान समेत बन्द भएको छ । 

वि सं २०११ देखि सञ्चालनमा रहेको टरिगाउँ विमानस्थलमा हाल उडान रोकिएको छ । नेपाल वायु सेवा निगमको जहाज गत पुस २ गते अन्तिम पटक टरिगाउँ विमानस्थलमा अवतरण गरेको नेपाल एयरलाइन्स स्टेसन इञ्चार्ज बलबहादुर सुनारले जानकारी दिए । सुनारका अनुसार निगमका विमानको इन्जिनमा समस्या आएपछि नियमति सेवा दिन नसकेको उनले बताए । 

टरिगाउँ विमानस्थलमा २०११ देखि २०४२ सालसम्म नियमित उडान हुँदै आएको थियो । २०५६ देखि २०५८ सालसम्म सेवा अवरुद्ध भएको थियो। सीता एयरले २०८० सालमा सेवा सुरु गरेपनि एक वर्ष नपुग्दै बन्द गरेको थियो। पछिल्लो समय नेपाल एयरलाइन्सले हप्तामा एक दिन उडान गर्दै आएको थियो।