तिमी धर्तीमा झर्दा
ईश्वरले पनि उत्सव मनाए होलान् ।
मेरा त झनै के कुरा भयो र ?
मेरा आँखाका डिलबाट झरेका
आँसुका हर एक ढिक्कालाई
सम्मान स्वरुप रोक्ने
तिम्रो अस्तित्वले
मेरो प्राण बच्यो ।
प्रश्नै प्रश्नका तिखा कटाक्षको
समाधान तिमी
तिमीले फेर्ने श्वासले
मेरो अस्तित्व स्वीकार्य बन्यो ।
मर्नु न बाँच्नुको वेदना
धेरैले देखे
नदेखेझैं पनि गरे
कोहीले मल्हम लगाए
कोहीले च्यातेर कुल्चिए पनि
साँच्चै एउटा जीवन
रछ्यान भन्दा बढी थिएन ।
साँच्चै एउटा प्राण
जिउनु र संघर्ष गर्नुको दोषाधमा थियो ।
एक्लै थियो, र पनि
तिम्रो आगमनको प्रतिक्षामा
मग्न अनि अठोट बोकेको थियो ।
कल्पना थियो
कठोर समयको संघारमा थियो
सपना बोकेको वेवारिसे थियो ।
एउटै संकल्प
झिनो आशाको त्यान्द्रो
मनमा कुटुरो पारी
दृढ आत्मविश्वास लिएर
कर्तव्यनिष्ठ बनी
संयम र धैर्य रहदा रहदै
अकस्मात तिम्रो आगमनले
मेरो संसार बदलियो
मेरा सबै बदलिए ।
उज्यालो, खुशी र उल्लासमय वातावरण
तिम्रै आगमनमा भयो ।
तिमी जन्मिदा जस्तै
म आउदा मेरा बाआमा खुशी थिए रे ।
तिम्रो तोते बोली
मेरो साथी बनेको छ अचेल
तिम्रो स्पर्श
ब्रह्माण्डै आफ्नो मात्रै लाग्छ ।
तिम्रो अँगालो
न्यानो र थकान बिसाउने
मेरो सुन्दर चौतारी बनेको छ ।
जहाँ म निर्धक्क खुशी हुन सक्छु ।
त्यसैले
तिम्रो दीर्घजीवन र सुस्वस्थ्यको कामना सहित
जन्मदिनको शुभकामना
मेरो प्राण, मेरी माया ।
