काठमाडौं - विभिन्न चित्रकारहरूको कला प्रदर्शनी गरेको हामी सुन्छौं तर विद्यालयले नै एकल कला प्रदर्शनी गरेको धेरैको लागि नयाँ हुन सक्छ । विद्यालयले विभिन्न खेलकुद गतिविधि, प्रतियोगिताहरू गर्छन् तर एउटा विद्यालयले विद्यार्थीको कलालाई सम्मान गरेर प्रदर्शनीमै राख्नु चुनौतीपूर्ण छ । तर त्यही दुस्साहस गरेको छ सितापाइलामा रहेको निर्भाना एकेडेमीले । 

निर्भानाले विद्यार्थीलाई कलामात्रै सिकाएन कलासँगै जिउन सिकायो । समाजसँग घुलमिल हुन सिकायो । आफ्नो कलाको बजार बुझ्न सिकायो । किताबी ज्ञान मात्रै सिकाएको आरोप लागेको हाम्रो शिक्षा नीतिलाई निर्भानाले चुनौती दियो ।

आर्ट आफैंमा सिर्जनात्मक कला हो । जुन रंगहरूले जीवनको अर्थ बोध गराउँछ । त्यही जीवनको अर्थ बोध गराउन र बुझाउन निर्भानाले दुई दिने प्रदर्शनी गर्यो।  भलै व्यापारिक हिसाबले यो प्रदर्शनी कमजोर सावित भयो होला तर कलाको हिसाबले यसले इतिहास रचेको छ । 

बबरमहलको कला परिषदमा भएको दुई दिने प्रदर्शनीमा विद्यार्थीहरू र अभिभावक एकदमै खुशी र उत्सुक भएको कला शिक्षक पुनम मास्केले बताइन् । ‘विद्यार्थीहरूलाई बाहिरको माहौलसँग घुलमिल गराउनु हाम्रो मुख्य उद्देश्य थियो’, उनले भनिन्,  ‘बच्चाहरू फिल्डमा आउँदा फरक माहौल पाएका छन् र उनीहरूको कन्फिडेन्ट लेभल पनि बढेको छ ।’ बच्चाहरू एकदमै उत्सुक हुन्छन् उनीहरूले टेलिभिजनमा देखेका विभिन्न दृश्यहरूलाई चित्रमा उतार्ने गरेको उनले सुनाइन् । 

प्रदर्शनीमा दुईवटा आर्ट मात्रै बिक्री भएका छन् । बाँकी आर्टहरू अभिभावकहरूले नै आफ्नो घर लाने उनले बताइन् । कलाबाट पनि बाँच्न सकिन्छ भन्ने विद्यार्थीलाई बुझाउन  प्रदर्शनी गरेको निर्भानाका प्रधानध्यापक निराजन अधिकारीले बताए । निर्भानाले शुक्रबार र शनिबार दुई दिन प्रदर्शनी गरेको छ । गत साल पनि निर्भानाले प्रदर्शनी गरेको थियो । यो विद्यालयको नियमित कार्यक्रम रहेको अधिकारीले जानकारी दिए । 

यो पनि पढ्नुहोस

निर्भाना एकेडेमीले दोस्रोपटक कला प्रदर्शनी गर्दै

यो पनि पढ्नुहोस

निर्भानाका विद्यार्थीका कलाले भरियो बबरमहल