काठमाडौं - विगतका सबै सहमति सम्बोधन हुने गरि विद्यालय शिक्षा ऐन जारी गर्नुपर्ने माग राख्दै शिक्षकहरूले काठमाडौंमा प्रदर्शन गरेका छन् ।
छिटो भन्दा छिटो विद्यालय शिक्षा ऐन जारी गर्न दबाब दिन भन्दै नेपाल शिक्षक महासंघको नेतृत्वमा काठमाडौंमा प्रदर्शन भएको हो । शनिबार काठमाडौंको बानेश्वरबाट माइतीघरसम्म गरिएको प्रदर्शनमा देशभरका हजारौं शिक्षकहरू सहभागी भएका थिए ।
प्रदर्शनमा सहभागीहरूले यसअघि भएका सहमति कार्यान्वयन गर, विद्यालय शिक्षा ऐन जारी गर लगायतका नारा लगाएका हुन् । विगतका सबै सहमति सम्बोधन हुने विद्यालय शिक्षा ऐन जारी गर्नको लागि राज्यलाई दबाब दिनका लागि प्रदर्शन गरिएको शिक्षकहरूको भनाइ छ ।
महासंघले प्रदर्शनका लागि उपत्यकाबाहिर रहेका शिक्षकहरूलाई काठमाडौं बोलाएको थियो । फागुन २५ गते राष्ट्रिय समितिको बैठक बस्ने र थप आन्दोलनका कार्यक्रम सार्वजनिक गर्ने महासंघले जनाएको छ ।
यसअघि पनि विद्यालय शिक्षासम्बन्धी विधेयकमा असन्तुष्टि जनाउँदै विद्यालय नै बन्द गरेर आन्दोलनमा उत्रिएपछि शिक्षकहरूसँग सरकारले सहमति गरेको थियो । तर सरकारले सहमति कार्यान्वयन नगरेको भन्दै शिक्षकहरू पुनः आन्दोलित भएका हुन् ।
