काठमाडौं - काठमाडौं सीतापाइलामा रहेको निर्भाना एकेडेमीले आजबाट कला प्रदर्शनी सुरु गरेको छ। नेपाल कला परिषद् बबरमहलमा प्रदर्शनी सुरु गरेको हो । प्रदर्शनी दुई दिनसम्म चल्नेछ । निर्भाना एकेडेकीका प्रधानाध्यापक निराजन अधिकारीले निर्भानाको नियमित कला प्रदर्शनीको दोस्रो संस्करण आजबाट सुरु भएको जानकारी दिए ।
निर्भानाले गत सालपनि कला प्रदर्शनी गरेको थियो । गत साल चित्रकार दिनेश चापागाईंले प्रदर्शनीको उद्घाटन गरेका थिए । विद्यालयको नियमित कार्यक्रमका रूपमा प्रदर्शनीलाई अगाडि बढाएको अधिकारीले बताए । ‘निर्भानामा ५० देखि ६० जनाको एउटा आर्ट क्लब छ’, उनले भने, ‘त्यो क्लबमा वर्षभरिमा आर्ट शिक्षकले जुन सीप सिकाउनुहुन्छ ती चित्रहरूलाई कम्पाइल गरेर उत्कृष्ट चित्ररूलाई काउन्सिलमा प्रदर्शनीमा राख्ने गरिन्छ ।’
विद्यालयले पनि आर्टहरू सिकाउनसक्छ र विद्यालय स्वयंमले एकल प्रदर्शनी आयोजना गर्न सक्छ भन्ने नमूना स्थापित गर्न खोजेको हो उनले बताए । यस्ता कार्यक्रमले विद्यार्थी र अभिभावक उतिकै उत्साहित रहेको उनको भनाइ छ । विद्यालयस्तरमा नै यस्ता कलाहरू सिकाउन सके मात्रै भविष्यमा उत्कृष्ट चित्रकार बन्न सक्ने अधिकारीले बताए।
यसपालिको प्रदर्शनी सफल हुने उनले दाबी गरे । आज निर्भाना एकेडेमीका विद्यार्थी र आमन्त्रित विद्यालयका विद्यार्थीहरूलाई सहभागी गराइनेछ भने भोलि विद्यालयका अभिभावक, शिक्षक र अन्य अतिथिहरू प्रदर्शनीमा सहभागी हुने कार्यक्रम छ । आर्टहरू २ हजार देखि २५/३० हजारसम्मको रहेको उनले बताए । अहिले निरन्तर रूपमा २०/२५ जनाले चित्रकलामा आफ्नो भविष्य कोरिरहेका छन् । उनीहरूले बनाएका चित्रहरू अन्तर्राष्ट्रिय स्तरका छन् । उनीहरूका १२ चित्रहरू विदेशीले मन पराएर किनेर लगेको अधिकारीले जानकारी दिए ।
