सिन्धुपाल्चोक  - नेपाली कांग्रेस महाधिवेशन प्रतिनिधि तथा नेपाल किसान महासंघका केन्द्रीय सदस्य उद्धव बानियाँ तथा नेपाली कांग्रेस बागमती प्रदेश प्रतिनिधि सुवास तिरूवाले शैक्षिक सामग्री वितरण गरेका छन् । 

ईन्द्रावती गाउँपालिका वडा नं ३ स्थित सिंहमती माध्यामिक विद्यालयका १३८ जना विद्यार्थीलाई शैक्षिक सामाग्री वितरण गर्नुका साथै खेलकुद सामाग्री समेत प्रदान गरिएको छ । बिहीबार नेपाली कांग्रेसका नेता तथा समाजसेवी बनियाँको प्रमुख आतिथ्यता र शिक्षक अभिभावक संघका अध्यक्ष केदार बहादुर थापाको सभाध्यक्षतामा विद्यालयमा एक कार्यक्रमको आयोजना गरि सो सामग्री वितरण गरिएको हो ।

शैक्षिक सामाग्रीहरूमा कपी २६५० थान, कलम ९०० थान र पेन्सिल ६५० थान रहेका छन् । त्यस्तै खेलकुद सामाग्रीहरूमा फुटबल २ थान, भलिबल २ थान, भलिबल नेट २ थान र फुटबल जाली २ थान विद्यालयलाई प्राप्त भएको विद्यालयका प्रधानाध्यापक गणेश ठकुरीले जानकारी दिए । 

कार्यक्रमलाई सम्बोधन गर्दै प्रमुख अतिथि बानियाँले विद्यार्थी भविष्यको उर्जा भएको उल्लेख गरे । विद्यार्थीको ज्ञानसिप पाठ्यक्रममा मात्र निर्भर नहुने भन्दै उनले विद्यार्थीको पहिचान गरेर प्रवर्द्धन गर्ने हो भने विद्यार्थीको भविष्य उज्ज्वल बन्ने बताए । ‘म मन्दिर कम विद्यालय बढी जान्छु, मैले पुज्ने मन्दिर नै विद्यालय हो’, बानियाँले भने । 

आफूले शिक्षा क्षेत्रमा निरन्तर सहयोग गर्ने प्रतिबद्धता व्यक्त गर्दै विद्यार्थीको प्रतिभा पहिचान गरेर अतिरिक्त क्रियाकलापमा पनि जोड दिनुपर्ने धारणा राखे । ‘हामी पढ्दा एक पट्टीको बेन्चको खुट्टा नै हुँदैन थियो, अहिले विद्यार्थीलाई धेरै सेवा सुविधा प्राप्त भएका छन’, उनले भने । 

त्यस्तै कार्यक्रमका विशेष अतिथि सुवास तिरूवाले विद्यार्थीलाई केही हदसम्म राहत होस् भनेर शैक्षिक सामाग्री वितरण गरिएको जानकारी दिए । ‘म जन्मेको हुर्केको ठाउँको मलाई धेरै माया छ, एक दिन भएपनि म यो विद्यालयमा अध्ययन गरेको छु’, समाजसेवी तिरूवाले भने । नेपालीहरू अशिक्षाले पछि परेको भन्दै यस विद्यालयका विद्यार्थीलाई देश विदेशमा नाम कहलिने गरि मेहनत गर्न उनले आग्रह गरे । घरबाट अनिवार्य रूपमा बालबालिकालाई विद्यालय पठाउन अभिभावक समक्ष उनले आग्रह गरे । साथै उनले सिंहमति माविलाई २० सेट फर्निचर उपलब्ध गराउने प्रतिबद्धता समेत व्यक्त गरे । 

विद्यार्थीलाई शैक्षिक सामाग्री वितरण गरेकोमा सम्मान गर्दै विद्यालयले समाजसेवी द्वय बानियाँ र तिरूवा लाई प्रशंसापत्र प्रदान गरेको थियो । कार्यक्रमको समापन गर्दै शिक्षक अभिभावक संघका अध्यक्ष केदार बहादुर थापाले शैक्षिक सामाग्री प्राप्त गर्दा विद्यार्थीको हौसला बढेको बताए । 

शैक्षिक तथा खेलकुद सामाग्री वितरण कार्यक्रममा समाजसेवी, शिक्षक, अभिभावक, पत्रकार, विद्यार्थी लगायतको उल्लेख्य सहभागीता रहेको थियो ।