काठमाडौं - काठमाडौंबाट धनुषाको जटही जादै गरेको बसमा सवार एक भारतीय नागरिक मृत फेला परेका छन् । मधेश प्र.००४–००१ ख ०१५७ नम्बरको स्टार नामक बसमा सवार भारत विहार मधुबन्नी सिमरीका ५५ वर्षीय जगदिश यादव बसमै मृत फेला परेका हुन् ।

यादव सोमबार साँझ बसमा चढेका थिए । मंगलबार बिहान धनुषाको लालगढमा बस पुगेपछि सिटमा सुतिरहेका यादवलाई गाडीका सहचालकले उठाउन खोज्दा उनी मृत अवस्थामा फेला परेका थिए ।  बसमा सवार अन्य यात्री तथा बस चालकले प्रहरीलाई घटनाबारे जानकारी गराएका थिए ।

इलाका प्रहरी कार्यालय ढल्केबरले बसका चालक र सहचालकलाई नियन्त्रणमा लिएको छ ।  प्रहरी निरीक्षक जटाशंकर यादवले मृतकको शव परीक्षणका लागि प्रादेशिक अस्पताल जनकपुरधाममा पठाएको बताए ।