प्रदेशसभा सचिवालयमा तीन वटा विधेयक दर्ता
मकवानपुर - बागमती प्रदेशसभा सचिवालयमा प्रदेश सरकारको तर्फबाट ल्याइएको तीन वटा विधेयक आज दर्ता गरिएको सो सचिवालयले जनाएको छ ।
दर्ता गरिएको ती संशोधन गर्नुपर्ने विधेयकहरु क्रमशः प्रदेश औद्योगिक व्यवसाय ऐन, २०७६ लाई संशोधन गर्न बनेको विधेयक र प्रादेशिक व्यापार तथा व्यवसायीसम्बन्धी ऐन २०७६ लाई संशोधन गर्न बनेको विधेयक रहेको प्रदेशसभा सचिवलायका प्रवक्ता मनोजकुमार गुप्ताले जानकारी दिए ।
यसैगरी, उनले मदनभण्डारी स्वास्थ्य, विज्ञान प्रतिष्ठान ऐन, २०७६ लाई संशोधन गर्न बनेको विधेयकलाई पनि दर्ता गरिएको बताए ।
प्रदेशसभाका सभामुख भुवनकुमार पाठकले आज संक्षिप्त कुराकानी गर्दै यही माघको तेस्रो हप्ताबाट प्रदेशसभाको बैठक बस्ने र सोही बैठकले ती तीन वटा संशोधन गर्नुपर्ने विधेयकलाई पूर्ण बैठकमा छलफल गराइ पारित गर्ने लक्ष्य रहेको बताए ।
उनले वर्षे अधिवेशनबाट विभिन्न समितिमा छलफलका लागि पठाएका केही विधेयकको प्रतिवेदनसहित आउने विधेयकलाई पनि सोही बैठकमा प्रस्तुत गरी छलफल गराउने कार्यसूची राखिएको पनि जानकारी दिए ।
प्रकाशित मिति: मंगलबार, माघ ८, २०८१ २१:१४
प्रतिक्रिया दिनुहोस्
थप राजनीति
साताको लोकप्रिय
